National workshop and Curriculum Review Artificial Intelligence and Its Applications Curriculum Review for MSc in Space Science and Engineering

  • Artificial Intelligence and Its Applications
  • Curriculum Review for MSc in Space Science and Engineering
በባሕር ዳር ዩኒቨርሲቲ የባሕር ዳር ቴክኖሎጅ ኢንስቲትዩት የኤሌክትሪካልና ኮምፒዩተር ምህንድስና ፋኩልቲ ሃገር-አቀፍ ዎርክሾፖች አካሄደ
-------------------------------------
ፋኩልቲው ነሐሴ 08/2013 ዓ.ም. “Artificial Intelligence and Its Applications” እና “Curriculum Review for MSc in Space Science and Engineering” በሚል ርዕስ ሁለት ሃገር አቀፍ ዎርክሾፖች አካሂዷል፡፡
በኢንስቲትዩቱ የመሰብሰቢያ አዳራሽ የተካሄደውን ወርክሾፕ ሳይንቲፊክ ዳይሬክተሩ ዶ/ር ሰይፉ አድማሱ በእንኳን ደህና መጣችሁ መልእክት የከፈቱ ሲሆን በመክፈቻ ንግግራቸውም ሃገራዊ አጀንዳ በሆነው ‘አርቲፊሻል ኢንተሊጀንስ’ ዙሪያ ወርክሾፕ ያዘጋጁትን የፋኩልቲው ዲንና መምህራን አመስግነው ዘርፉን ተጠቅሞ ምርምርና የማህበረሰብ ተሳትፎወችን ማከናወን በተቋሙ የአምስት ዓመት ስልታዊ ዕቅድ ላይ የተካተተ መሆኑን ጠቁመዋል፡፡ አክለውም ሌሎችም ፋኩልቲዎች ተሞክሮውን ወስደው መሰል ትምህርታዊ አውደርዕዮችን እንዲያዘጋጁ በማሳሰብና በወርክሾፑ ለተለያዩ የማህበረሰብ ተሳትፎና ችግር ፈች ምርምሮች መነሻነት የሚያገለግሉ ምክረ-ሃሳቦች የሚነሱበት እንደሚሆን እምነታቸውን ገልጸው የወርክሾፑን መከፈት አብስረዋል፡፡
የኤሌክትሪካልና ኮምፒዩተር ምህንድስና ፋኩልቲ ዲን አቶ ቴዎድሮስ ጌራ በበኩላቸው ስለ ፋኩልቲው የሚግልጽ አጭር ጽሁፍ ለተሳታፊዎች አቅርበዋል፡፡ በጽሁፋቸውም በ1955 ፖሊ ቴክኒክ ኢንስቲትዩት ተብሎ ተቋሙ ሲመሰረት አሌክትሪካል ቴክኖሎጂ በሚል ፕሮግራም ጀምሮ አሁን ላይ የኤሌክትሪካልና ኮምፒዩተር ምህንድስና ፋኩልቲ እስኪሆን ድረስ ያለፈባቸውን የዕድገት ሂደቶች አስቃኝተውና በዚህ ወቅት ስለሚሰጣቸው ፕሮግራሞች በዝርዝር ገልጸው ስለ ‘አርቴፊሻል ኢንተሊጀንስ’ በኮርስ እና በፕሮግራም ደረጃ የፋኩልቲውን ተሞክሮ ለተሳታፊዎች አጋርተዋል፡፡
በመርሃ-ግብሩ ላይ ተጋባዥ የነበሩት ዶ/ር በአካል ግዛቸው ከአዲስ አበባ ዩኒቨርሲቲ “AI: Key Enabler for Sustainable Development Goals” በሚል ርዕስ እና ዶ/ር ተፈራ ተረፈ ከአዳማ ሳይንስና ቴክኖሎጅ ዩኒቨርሲቲ ”Application of Swarm Intelligence for Maximum Power Extraction of Photovoltaic System under Partial Shade Condition” በሚል ርዕስ ጽሁፍ ያቀረቡ ሲሆን በፋኩልቲው መምህርና ተመራማሪ የሆኑት ዶ/ር መዝገቡ ጌትነትም ”Artificial Intelligence Applications in Power Systems & Energy Informatics” በሚል ርዕስ ያዘጋጁትን ጽሁፍ አቅርበዋል፡፡
በቀረቡት ጽሁፎች ዙሪያ አጠር ያለ ውይይት የተካሄደባቸው ሲሆን በወርክሾፑ ማጠናቀቂያም በተማሪወችና መምህራን የተሰሩ የምርምር ስራዎች በፖስተር መልክ ተዘጋጅተው ለተሳታፊዎች ቀርበዋል፡፡
በዕለቱ በሌላ መርሃ ግብር ፋኩልቲው በኮሙኒኬሽን ሲስተምስ ኢንጂነሪነግ ስር የ”Space Science and Engineering’ የሁለተኛ ዲግሪ ፕሮግራም አዲስ ስርዓተ ትምህርቱን ሃገር አቀፍ ዎርክሾፕ በማዘጋጀት አስገምግሟል፡፡ ስርዓተ ትምህርቱ የተቀረጸው ከፊዚክስ ዲፓርትመንት እና የሜካኒካልና ኢንዱስትሪያል ምህንድስና ፋኩልቲ ጋር በመተባበር ሲሆን የኢንስቲትዩቱ የአካዳሚክ ምክትል ሳይንቲፊክ ዳይሬክተር ዶ/ር ደምስ አልማው ተገኝተው ወርክሾፑን በመክፈቻ ንግግር አስጀምረዋል፡፡
የስርዓተ ትምህርት ቀረጻ ኮሚቴው ማብራሪያ ከሰጠ በኋላ ከተለያዩ ዩኒቨርሲቲዎች የተጋበዙት የዘርፉ ምሁራን የያዟቸውን አስተያየቶችና ግምገማዎች አንጸባርቀዋል፡፡
በመጨረሻም ኮሚቴው ከምሁራኑ ያገኛቸውን ጠቃሚ አስተያየቶች ተጠቅሞ ማሻሻያ በማድረግ እና ቀሪ ሂደቶችን በማከናወን ፕሮግራሙን ለመጭው የትምህርት ዘመን ዝግጁ ለማድረግ እንደሚሰራ ገልጿል::
images: 
Share